Gehitu eta Mugen Gainetik elkarteen (des)eraikiz programari esker, Esnatu Naiz kabaretaren emanaldiak eskaintzen ari gara Gipuzkoako eskoletan 2022az geroztik. 2023ko maiatzean, berriz, Sex Sua musikalaren emanaldi bereziaz gozatzeko aukera izan zuten DBH eta Lanbide Heziketako 120 ikaslek Urnietako Sarobe antzokian 2023ko udaberrian. Eta 2023-2024 ikasturtean ere Mugen Gainetik eta Gehiturekin batera elkarlanean jarraitzeko asmoa dugu.

Horrez gain, gure sorkuntzak ikasleekin partekatzeko ahaleginean urrats berria eman dugu, bi ikuskizun horiek Gipuzkoako Aldundiaren Kultura Eskola programako katalogoaren parte direlako gaur egun. Zer esan nahi du horrek? 2023ko udazkenetik aurrera DBHko bigarren zikloko ikasleei (15-16 urte) zuzendutako emanaldiak eskaintzen hasiko garela.

Informazio gehiago:

• Esnatu Naiz kabareta, Kultura Eskola katalogoan.
• Sex Sua musikala, Kultura Eskola katalogoan.

Urte hauetan bildutako ezagutzak eta bizipenak partekatzeko unea iritsi dela sentitu dut. Eta Sormen Tailer hau horren ondorioa da, kazetari eta irakasle lanetan aritzeak emandako esperientzian eta egindako ikastaro eta formakuntzetan oinarritu naizelako proiektu hau prestatzerakoan. Proposatzen ditudan ariketa guztiak ikasitakoaren emaitza dira eta niri lagundu didaten moduan, ikasleentzat baliagarriak izango direla espero dut.

Sormenak berebiziko garrantzia du niretzat. Umea nintzela, argi nuen zer izan nahi nuen handitzerakoan: aktore eta abeslari. Eta asmo horiek bultzatuta, antzerkiko ikastaro batean eman nuen izena 11 urterekin. Garbi Losada izan zen nire lehen irakaslea eta ordutik harreman intermitentea izan dut antzerkiarekin: Lasarteko Kukuka, EHUko antzerki klaseak, Donostia Kulturak antolatutako ikastaroak, Musikomeria, Artedramak Aulestin antolatzen duen Antzerki Laborategia, Zestoako Antzerki Eskola…

Dantzak, berriz, pisu handiagoa izan du nire bizitzan: fandango eta arin-arin txapelketak, Donostiako Eskola dantza taldea, funkyko klaseak, dantza garaikidea, kontakt inprobisazioa. Asko zor diot dantzari, batez ere arlo pertsonalean. Hori bai, duela gutxirarte antzerkia eta dantza zaletasuna izan dira niretzat. Afizioa. Izan ere, kazetaritza eta magisteritza ikasi nituen, eta bi esparru horietan aritu izan naiz lanean batez ere ia 20 urtez. Ofizioa.

2017an, ordea, Euskadi Irratian eszedentzia hartzea erabaki nuen. Atseden luzea. Egia esan, ez neukan argi zertarako. Baina ordutik sormenari merezitako tokia eskaintzen ari naiz nire egunerokoan. Prozesu luze eta aberasgarri horren emaitza dira Esnatu Naiz kabareta eta Sex Sua musikala. Eta hortxe nabil gaur egun, emanaldiak eskaintzen inguruko hiri eta herrietan. Gozatzen eta gozarazten.